برقية الى بايدن: ياضيفنا لو زرتنا لوجدتنا نحن الضيوف وانت رب المنزل

ما ادري ليش ما تسمعون كلامي . مو آني گلتلكم أن الانتخابات هاي المرة بين جماعة ايران وجماعة امريكا وان ذولة راح يفوزون لأن امريكا ماعدها بعد وقت تلعب ألاعيبها المعتادة ؟ لعد ليش بايدن صار نائب رئيس وليش وليش ..

بايدن يشرفنا في محميته الخضراء لأن جماعة ايران رادت تستعرض عضلاتها اللي تذكرني بذاك الممثل الهزيل النحيل الذي يقول على خشبة مسرح مصري متحديا البطل عريض المنكعين "ما تقدرش " والرجل الضخم برفعه بيديه مثل مارد يرفع عصفورا، وهذا مايزال يصرخ "ماتقدرش" ..

حسنا جاءكم الرجل الأخضر خلينا نشوف شلون راح تحتفظون بماء الوجه حين تمسحون بجرة قلم هيئة المساءلة والعدالة بكاملها وليس فقط قرارها. جماعة امريكا راح تفوز في هذه الانتخابات ، فالشاطر منكم يهرع الى رمي العمامة ، ويرتدي الجينز، ويرفع يديه لجمهوره محييا : هاي !

بصراحة .. الفرجة لاتعوض .. لا سينما . و لا مباراة كرة قدم .. ولامصارعة .. ولا توم وجيري ولا مهند التركي يتكلم سوري ولا ايدي مورفي يصرخ "شو .. خيو؟" ولا الممثل الهندي كومار يتحدث كويتي، فرجة ليس قبلها ولا بعدها. خليكم مسمرين امام قناة غار عشتار ، لا تلعبوا بالرموت . أول شيء اريد أن اسمع احدهم يقول لبايدن عيني عينك وبأية لهجة (ايرانية سورية لبنانية كويتية وحتى عراقية ) هذا تدخل في الشؤون الداخلية !!!

ثم ألا تلاحظون ملاحظة غريبة ؟ هذه اول مرة منذ الاحتلال يعلن عن زيارة مسؤول امريكي الى العراق قبل وقوع الزيارة (المفاجئة) ، وإن لم يعلنوا عن موعدها ولكن الأخبار تقول "هو في الطريق الى العراق" وهذا شيء جديد!!