الكاتب العراقي الذي يتخذ اسم (حبيب العربنجي) وينشر في موقع (كتابات) كتب مؤخرا مقطوعة حول خبر سعيد يهم العراقيين وهو نجاح زراعة الفراولة في العراق، لأنها كل ماكان ينقصنا من غذاء استراتيجي. اليكم شرائح فراولية من مقالته الساخرة :الخبر السعيد يكول.. أعلن الباحثون الاميركان نجاح زراعة الفراولة لاول مرة في العراق.... اللهم لا حسد.. أللهم أدفع عن العراق حسد أهل الخليج وحسد ملك السويد إللي حاير شلون يدبر اللقمة الطيبة لشعبه.. وأدفع عن العراق حسد أمير موناكو إللي ما يعرف الفرق بين البطاطا وكيوي وخطية لحد هسة يسمي الكيوي البطاطا ام الشعر.. ويقال أن الباحثين الاميركان جانوا يشتغلون في هذا المشروع الخطير بسرية بالغة خوفا من التسرب الإشعاعي للفراولة إلى الدول المجاورة.. وبخاصة تداخل الإشعاع الفراولي مع الإشعاع النووي للمنشآت النووية الإيرانية..
وعبالكم الفراولة هينة وسهلة.. صدك غشمة.. يمعودين الفراولة أصلا المفروض واحد يسميها حجة الله في الأرض وآية الله الكبرى .. يعني الفراولة تنافس خامنئي والستياني وخاتمي والحكيم وكل العمائم والحجج ولهذا السبب أحتفظ الاميركان بهذا السر الخطير وأعلنوا نجاح المشروع الخطير مع بدء الحملة الإنتخابية ومع بدء إيران بتخصيب اليورانيوم إلى 20% وأكثر وإعلان إيران عدها غريندايزر بس بعده بالشحن، وجاء الإعلان الاميركي في ذكرى الثورة الإيرانية نكاية بإيران إللي ما كدرت تزرع الفجل في حدائق مشهد وما كدرت تسوي كليجة أم التمر باستخدام بدائل محلية بعد فرض عقوبات تجارية عليها.
بس الاميركان أحتفظوا لنفسهم باسرار الفراولة العلمية.. يعني هم بس كالوا نجاح زراعة الفراولة بس ما كالوا شنو فائدة هذا المشروع على الأهداف الدوشكية والإستراتيجية للوجود الاميركي في العراق أو على العملية الجراحية السياسية لبواسير الحكومة العراقية.. يجوز الفراولة تستخدم في عمل مرهم موضعي لبواسير الحكومة؟.. كل شي يجوز.. يمعودين جيبوا محمد كاشف القبغ أقصد كاشف الغطاء بلكن يكشفنا حقائق وأسرار الفراولة وليش هي كلش مهمة للمواطن العراقي في هذا الوقت بالتحديد ..
أويلي كل هذا من الفراولة.. لعد الجزر شلون.. لو الخيار التعروزي (وفي رواية أخرى الترعوزي) شلون....بس مدا نعرف المشروع الفراولي نجح بمساعدة علماء الفلاحين العراقيين لو بمساعدة مكوك الفضاء الأميركي أنديفور والذي انطلق من قاعدة عفج الجوية وبأشراف هيئة علماء المسملمين الوكيل الحصري لوكالة ناسا في العراق لو ما حد شاركهم هذا الإنجاز البقولي.. أقصد البطولي مو اليوم العرك أشوية مخبوط وياه تايت ويوفوّت هوا وي فقاعات التايت.. وتخيلوا كل مواطن عراقي راح ياكل حبة فراولة باااااااااااردة (ميخالف ماكو كهرباء مو هاي الفراولة تجي باردة من كيفها) على الريوك وي الكيمر.. لو أم الجهال تحب الرومانسيات وتدلل أبو الجهال وتجيبله سلة فراولة وي المزة وبيك العرك.. ويوجز الفراولة راح تصير وحش الطاوة العراقية بعد أن أعتزل البيتنجان بعد خدمة ممتازة في الملاعب العراقية والمطابخ العراقية طول فترة الحصار.. يعني العراقيون إللي سووا من البيتنجان كيكة عرس مو بعيدة عليهم يسوون من الفراولة تبسي سمج ومطبك وي التمن الأحمر.
ولا تستغربوا من تسمعون الإخبار القادمة..فكل شي متوقع في العراق.. لأن إحنا الدولة الوحيدة بالعالم إللي كرمنا الزمايل والجلاب والخنازير ولبسناهم قوط وأربطة.. وصرنا نصيحهم نوبات سعادة الوزير واحيانا دولة رئيس الوزراء... وربما سيادة الرئيس.
الحقيقه عشتارتنا و للامانه التاريخيه يجب ان اذكر ان خالتي ام قحطان كانت زارعه فراوله في بيتها اللي بالعامريه و هاي من قبل حواي 22 سنه.و الحقيقه هي اللي كانت السبب في هجره فاضل ابن حجي ابو فاضل الى استراليا من سمع بيهه هوايه فراوله و كال حتى لو بتالي الدنيا لازم اروح و اشبع فراوله. لا حاجه للذكر انه كتب لنا ذاكرا انه نسي الفراوله و السبب الذي هاجر من اجله عند رؤيته شقراوات استراليا..المهم خالتي ام قحطان جانت تسميهه " شلًييك" و لا ادري هل هذا اسم ثاني للفراوله لو اسم مشروع خالتي ام قحطان السرُي لزراعه الفراوله...كانت عفريته في زراعه و تنميه شغلات لا تخطر على بال مثل البرتقال الياباني الصغير الحجم و الذي يؤكل بقشره. المهم الحديقه مال خالتي ام قحطان راحت من بنوا المشتمل لابنهم قحطان..لو الامريكان اذكياء جان راحوا لخالتي ام قحطان و هييه علمتهم شلون يزرعون الفراوله بالعراق...بس ارجع و اكول الاميركان يعجبهم يصرفون فلوس على الخالي بلاش و على العموم خطيه الاميركان على الاقل باجر من يطلعون بسواد الوجه " عفوا حجي اوباما " راح يكولون همه سووا شئ ناجح بالعراق...بس و داعتج راح تلكين بصمات احمد الجلبي وراء هذا المشروع لغايه في نفس يعقوب...و بس لو اعرف منين خالتي ام قحطان جابت البذور
ردحذفكشخه بعد شنريد فراولة..
ردحذفيلا خلي يكول الشعب العراقي شنو انجازات الحكومة والمحتل..
مهتمين بينه، وفراوله اول الغيث، صحيح اتاخرت سبع سنوات بس معلش، مو اسمها سربرايز..
بعدين لبيب شلون تريد الامريكان يجون على خاله ام قحطان؟؟ حتى لو قبلت، فراح تعمل ميزانية مضبوطه، مابيها فلس زايد، وانت تدري الجماعه مراح ينفعهم هذا الحجي.. هو اكيد اكو واحد وراه الفراولة، بس منو هذا الي يحب الاحمريكو؟!
لازم تسأل قحطان من وين كان مصدر الفراولة حتى عشتارنا تجر الخيط وتعرف الشريك..
و الله صدقت يا جيفاريه..خالتي ام قحطان راح تسويلهم ميزانيه مظبوطه و تخليهم ينتجون فراوله بازهد الاثمان...و بعدين يطلعون اسمهه ويه صالح المطلك و هوب " يجتثون" المسكينه...لا عمي اسحب كلامي المسكينه لا زارعه فراوله بحديقتهم و لا هم يحزنون...هو جان تكًي احمر جبير و شجرته صغيره و آني عبالي فراوله
ردحذفلبيب
ردحذف"شلّيك" بهاي الشغلة !!؟