"المدونة محمية بميثاق الشرف. أرجو الإشارة الى اسم (غار عشتار) والكاتبة (عشتار العراقية) عند إعادة النشر"

24‏/8‏/2014

في طور الظهور: تنظيم أخطر من داعش

غارعشتار
د. ماكس لا يتوقف عن ابتكار الأفكار والمشاريع، ورغم أن أغلبها كان ينتهي بالفشل (إن لم يكن كلها)ولكنه لا يكل ولايمل. منذ عدة أيام كان منهمكا على الانترنيت ، صامتا، مفكرا، لايستجيب لأي مقاطعة حتى لو كانت دعوته للطعام. وكل الذي كنت اردده مع نفسي حين أرى احواله تلك هو "الله يستر". اليوم اقترب مني وقال بلهجة غامضة:
- مارايك بداغش؟
- تقصد داعش؟
- لا .. قصدي داغش. تنظيم جديد نوفي لنك.
- وين هذا؟
- هنا في الغار.
- شنو قصدك؟ وطي صوتك لاتسمعك الاقمار الصناعية، راح تودينا في داهية. أكو تنظيم هنا في الغار؟

- راح يصير، اسمعي : الدولة الارهابية في الغار والشنار . اختصارها (داغش) اسم رهيب ، مو؟
- دقيقة دقيقة، انت عندك مشكلة بالنقطة على الحروف. ماكو شي  اسمه الغار والشنار، يمكن تقصد العار والشنار.
- ماكو فرق .. المهم الاختصار : داغش قريب من داعش وراح يختلط على الناس.. كل ما يشوفون فيلم رعب راح يتساءلون : داعش او داغش؟ وبهاي الطريقة نوفر على انفسنا الكثير من تكاليف الدعاية. كما نوفر الكثير من المصاريف الاخرى مثل الازياء ..
- شلون؟
- احنا الرتوارية (يقصد فصيلة الروتوايلر) زينا الاصلي أسود، يعني مانحتاج مصانع وخياطين. وشكلنا مرعب فما نحتاج اقنعة.
- اي وبعدين؟
- كل اللي نحتاجه منك ان تساعدينا بنشر صور تطير النوم من عين العدو.
- وضح أكثر.
- يعني يوم تنشرين هاي الصورة:
وجمالها انه لن يعرف أحد إذا كان هذا عظم انسان أو حمار .. المهم الصورة راح تبث الرعب في القلوب الضعيفة. وشوفي لو كان عنوانها (زعيم الرتوارية يأكل فريسته) ، وتطلعين في التلفزيون تصرخين ويغمى عليك ولكن قبلها تطلبين النجدة (أواه يا اوباما، ساعدونا للقضاء على الرواترة، نريد سلاح نريد دولة ) وبعدين يغمى عليك. وإذا تلكأ اوباما شوية ـ عاجليهم بنشر صورة اخرى.
- هاي شنو ماكس، منو هاي؟
- هاي الرهينة . شوفي شلون خايفة؟ لاحظي حركة اذانها ، لاحظي عيونها المرعوبة؟ اعتقد هاي الصورة ضربة معلم. ماكو واحد في العالم المتحضر يمكن يشوفها ويسكت. وشوفي الطبق الفارغ النظيف؟ يمكن تكتبين شوية انشاء عن محاصرة  الرتوارية للقطط الرهائن وتركها بدون ماء وطعام.
- زين وشنو هدفك من كل هذا؟
- تقصدين هدفنا!
ابتلعت ريقي ولم أجب.
- هدفنا هو الاستقلال بالغار. بدل من ان يكون مجرد دكان صغير في مول غوغل، نتمدد ونفتح باب خارجي ونرفع لافتة كبيرة مكتوب فيها (غارستان) ولن تكون لنا علاقة لا مع غوغل ولا موغل.. لا ندفع ايجار ولا ارضية. احنا وبس.
قلت بصوت هامس: والله هدف معقول. ولكن اعتقد اول شي هو لازم نطلع بيان داغشي. ونحط صورتك بصفتك زعيم داغش، ونكتب طلباتك. خلي نشوف ارشيف الصور. شنو رأيك بهاي الصورة؟
- لا معودة هاي صورة المفكر الناعم. اريد صورة فيها وحشية.
- زين هاي الصورة ؟
- آآآآه ... ماكو غيرها؟ يمكن هاي احسن .. اقرب للقوات الخاصة. كاسكيتة ونياشين.
- ماكو غيرها. البقية كلها استهلكناها لما شاركت في انتخابات 2010


- أوف .. ليش ذكرتيني؟ كل اللي سويته للست ريمة .. حتى دخلتها الانتخابات وصرفت عليها، والنتيجة؟ مانطت ظهرها للجماهير بس، ولكن آني هم عافتني ومشت. القصد.. حطي كل هذا بالبيان. لا .. مو قضية ريمة الخاينة، ولكن اكتبي أني حاولت ان ادخل العملية السياسية، وقبلت حتى بالديمقراطية ، ولكن هم اللي (جعلوني مجرما) تحولت من الاعتدال الى التطرف.  يعني شنو  كنت اللي طالبه غير شوية عظام؟
++
إذا كان لديكم وقت طويل اقرأوا ملف د. ماكس 

هناك 7 تعليقات:

  1. اخاف ان الغار يتحول لوكر ارهابي ويشنون عليه حملات مداهمة وبعدين يختموا بالشمع الاحمر !!!!!!!!!!!!!!!

    ردحذف
    الردود
    1. كل شي جايز .. خليك بعيد، خاصة اسمك مريب شوية ويبدأ بالمقطع الارهابي (أبو)

      حذف
  2. تحية من العراق إفى أين... لكِ ولكل القراء المحترمين،
    يمعودين كافي هالسيرة... أحنة دنمشي وية الحايط وو صايرين نصبة للعالم، النوبة د. ماكس يجي إيكملهة علينة؟
    لا وإذا أيسويهة ... بعد حتى على جبل سنجار منلحك نصعد... العينتين عنده أربع رجلينات

    ردحذف
  3. طبعاً شديد الإحترام لكل الضحايا... والله ما أقصد ... بس حياتنا أصبحت مزيج بين الفكاهة المرة لواقع ابله وبين ترويض العقل ليتقبله (حتى لا تطفر الجوزة)

    ردحذف
    الردود
    1. د. ماكس يسلم ويقول لك (هاو هاو) يعني بالعربي (هالو) ويسأل سؤالا على هامش تعليقك
      - "هاي الجوزة شلون طعمها؟ واحسن نشويها لو ناكلها نية؟"

      حذف
  4. هاي جوزة الحماوة مال مروحة السيارة... حقيقة ما أعرف طعمها بالضبط، بس أكيد إذا أكلهة راح تفترين بيه كل بيطريين المدينة...

    ردحذف