"المدونة محمية بميثاق الشرف. أرجو الإشارة الى اسم (غار عشتار) والكاتبة (عشتار العراقية) عند إعادة النشر"

16‏/6‏/2011

بزنس الرئاسة: غداء الرئيس على حسابك

هل تريد أن تتناول الغداء مع براك اوباما رئيس الولايات المتحدة ؟ بسيطة ولكن هناك شروط : اولا ان تكون مواطنا امريكيا أو حاصلا على الاقامة القانونية، ثانيا ان تتبرع له بمبلغ يتراوح من 5 دولارات الى 500 دولار او اكثر. وأن يكون التبرع من حر مالك، غير مسروق من خزينة امريكا ولا من جيب شخص آخر. ولا يكون سنك اقل من 16 ، سيستضيف اوباما 4 من المتبرعين لتناول الغداء معه. طبعا سيفوزون بهذه المناسبة السعيدة بالقرعة الآلية.

السؤال هو : ليش مايطبق ضخامة فطيسنا أساليب التسول الديمقراطي الحلوة هاي ، وكل مرة يگعد ياكل باجة يعزم اربعة متبرعين بفلوسها. وكل اللي عليه يسويه يجچيلهم نكتة عن نفسه  قبل ما يستولي النعاس عليه وينام واللگمة بحلگة.

هناك 17 تعليقًا:

  1. يعني اذا اريد اسوي ريجيم ممكن اكابل هل جهرة اللي تسد النفس (حشا خلقة رب العالمين) و لكن بفلوسي و اكابله على الاكل !!
    يكفي ريحة الخياس الفايحة من سوء اعمالهم و فضايحهم هزمت نص البلد بره.

    ردحذف
  2. دريول .. هناك خيار ستراتيجي آخر. أنت تبعث التبرع (وانصحك مايزيد على 5 دولار لأن المسألة قرعة) ولما تفوز تگول لهم "اريد الأكل سفري (تيك اوي) دزوه على هالعنوان .." الأكل بس من غير الطرشي الرئاسي!!

    ردحذف
  3. العفو عشتار
    ولكن هل تعتقدين ان ضخامته رئيس لدولة تعبانه مثل امريكا (رئيسها حي الله يطلعله 40 الف دولار بالشهر) حتى يقبل ب 5 دولارات؟؟

    ردحذف
  4. نقطة مهمة . فعلا لن يقبل بذلك ، ولكن لنقل ان الحد الأدنى كان 100 دولار، وهو أدنى مبلغ يليق بالفخامة والضخامة، يعني هل تبخل على نفسك بأكلة باجة فخمة رئاسية معتبرة عمرك ما أكلت مثلها، توصلك لحد البيت وعليها بوسة من الرئاسة؟

    ردحذف
  5. وكما قال الشاعر الشعبي بهذه المناسبة:

    رويحتي وزتني على باجة فخيمة
    كالو ادفع ورقة خضرة جايزتها عظيمة
    خروف ريسنا على تمن عزيمة
    صحت بحيل حسي على مرتي نظيمة
    كالت الورقة طارت عالدوا واجر الحكيمة
    يعني راحت الباجة عليّ؟.. ياحريمة!!

    ردحذف
  6. ومن الهوسات العراقية الشهيرة التي يصدح بها شيوخ الاحتلال بهذه المناسبة:

    ها أخوتي ها ..

    ورقة وديزتلك يالكاكا
    طارش دز النا هاليوم

    وأيضا

    ها اخوتي ها..

    الكل متاني هاي الأكلة
    الباجة وكراعين البيها

    ردحذف
  7. أو كما قال الشيخ هفتان وهو يتصل هاتفيا بمطعم الرئاسة الخمس نجوم لايصال الباجة ديلفري الى قصره:

    ألو اخوتي ها . ..

    البييبسي وية الباجة لزوم
    وكروة الدريول ننطيها

    **

    المعذرة للأخ دريول لأن المقصود هنا هو السائق الذي سيوصل الطلبات.

    ردحذف
  8. بصراحه اني مالي ثقه بهل فطيس لان اكيد راح يلغف ال5 دولارات ويفلت لان اساسو حرامي ويتحجج انو ما فزت بالقرعه . وبعدين تروح علي العزيمه وال 5 دولارات....

    ردحذف
  9. عشتار عزيزتي بيها مجال اختيار نوع الطعام بالعزيمة لان اني بصراحة ما احب الباجة نعم احب التشاريب و احب كباب السليمانية الاصلي و القوزي على التمن بس الباجة نه خدا حافيز

    ردحذف
  10. أبو يحيى .. انتظر حتى اسألك نائب الرئيس لشؤون التيك أوي. صحيح من الصعب ارضاء الناس!!

    ردحذف
  11. مستشار الرئيس الشيوعي المخضرم فخري كريم و مدير ديوان الرئاسة الاخوانجي الملمع نصير العاني خوش خبطة بربي بس ياهو منهم راح يصير مسؤول التيك اوي

    ردحذف
  12. يا ابو يحيى .. يعني هاي ينرادلها سؤال؟ طبعا فخري كريم لأنه:

    1- اممي يعني يشتغل على نطاق دولي وعلاقاته واسعة فيستطيع ضمان اكبر توزيع للباجة

    2- مؤسسته اسمها (المدى) ومضمون الاسم يعني التوزيع على اوسع مدى.

    3- الفرق بينه وبين الاخوانجي ان الاخير سيقول لك هذا حرام وذاك حلال، وهذا البيت تدخله الملايكة وذاك تدخله الشياطين، فتوزيعه راح يكون مقتصر على ناس وناس. غير انه راح يركن السيارة خمس مرات في اليوم حتى يصلي، وهذا طبعا يخلي الباجة توصل متأخرة وباردة.

    4- لا يخفى عليكم أن توصيل الطلبات يعني امكانية اضافة فواتير فلوس زيادة بدون ان يحاسب احد: نفقات البنزين والسائق واخطار الطريق والعبوات الناسفة، وشقاوات بغداد، والمظاهرات المليونية اللي تسد الطرق، وطبعا هناك الحرس البيشمركة اللي راح يوظفهم لحماية قافلة التوصيل. اضافة الى البخشيش اللي راح يحصل عليه من البطرانين اللي طلبوا الباجة الرئاسية. يعني شغلة كلها مكاسب!!

    ردحذف
  13. عشتارتنا...هسه انت فتحتي باب مراح ينسد...يعني هسه اذا الجلب...ي قرا هذه المقاله فراح نشوف سيل من الايميلات يبلغنا بقرعه للفوز بعشاء مع مارلين مونرو او قضاء امسيه مع بلبل العيراق ماما جلال او قضاء خمسه ليال في فندق سبعه نجوم مع شحروره الفضاء ليدي كاكا او قضاء كم ساعه مع ارسين لوبين الجلبي للاطلاع الحصري على حل لغز اختفاء نقود البتراء بس المطلوب كم ورقه خضره و رقم الحساب المالي مع تخويل كامل بسحب اي مبلغ من حسابك الرقمي...و ستجري القرعه في قاعه مفوضيه النزاهه في الثلاثين من شهر شباط للعام المقبل...اسرعوا فالدخول محدود لذوي الدخل المحدود و غير المحدود

    عشتارتنا...شنو هالروعه الشعريه....أول مرًه اشوفك تكتبيين شعر...بس منو هذا الشيخ هفتان؟

    ردحذف
  14. لبيب

    اولا الحمد لله على السلامة . ثانيا هاي اول مرة واحد يعلق على امكانياتي الشعرية. ثالثا الشيخ هفتان ؟ هذا فد واحد جوعان يحب البيبسي كولا.

    ردحذف
  15. الله يسلمك...و الله انفلاونزا من هاي الحارق خارق...لهسه بعد جسمي تعبان منها...شكرا جزيلا عشتارتنا

    ردحذف
  16. زين يا واحد منهم...الشيخ هفتان الاول ام الشيخ هفتان السابع عشر بعد المليون...همه صايرين هوايه هالايام

    ردحذف
  17. حركة حلوة و لو ان ظاهرها تسول بس خلي الواحد يتخيل ان شارك ماديا في دعم رئيس ما
    اظن لو الطريقة دي و ما شابهها جمعت له مبلغ محترم لدعايته الانتخابية لن يضطر اوباما للتسول من الاثرياء الصهاينة فيضظر الى ان ينافقهم سياسيا و يتبع سياستهم في حال توليه

    ردحذف