"المدونة محمية بميثاق الشرف. أرجو الإشارة الى اسم (غار عشتار) والكاتبة (عشتار العراقية) عند إعادة النشر"

10‏/1‏/2011

إذا مات الرئيس !

مابين الإنشغالات ، طرأت على ذهني فكرة غريبة : هسة الرئاسات الثلاثة ، كل رئاسة عدها 3 نوايب : واحد شيعي وواحد سني وواحد كردي ، أو واحد تركماني وواحد مسيحي وواحد سني أو واحد كردي وواحد شيعي وواحد مسيحي ، يعني كل تشكيلة تختلف باختلاف المصيبة الجبيرة اللي ذولة النوايب ينوبون عنها . يعني خلف خلاف.

الفكرة اللي طرأت فجأة ، هو انه اذا طركاعة أخذت الراس الجبيرة ، وتعرفون تصاريف القدر كثيرة، والله رحمن رحيم ويرأف بعباده. زين في مثل هيجي حالة ، منو من النواب ياخذ مكان الرئيس؟ مو هاي شغلة النائب ؟ أن ينوب في حالة راح الرئيس في ستين داهية ؟ زين هسة راح تصير عندنا مشكلة دستورية ماأظن أحد فكر فيها. توقعوا إذن عركات وكواتم وهاونات بين النوايب الثلاثة . مثلا عدكم رئيس الجمهورية كردي بقوة الدستور والبيشمركة ونوايبه مو أكراد وانما من تشكيلة الألوان الأخرى ، زين اذا مات الكردي، يصير يتسلم منصبه السني أو الشيعي أو التركماني؟

وإذا مات دولة رئيس طويريج ، فهل يصح ان يتسلم رئاسة الوزراء سني ؟ أم كردي ؟ أم تركماني؟ لأنه كما أظن ليس في نوايبه شيعي ! يعني معقول تروح الرئاسة من علي الى عمر ، مرة ثانية؟

زين هل النوايب ذولة عدهم ترقيم ؟ يعني نايب اول ونايب ثاني ونايب ثالث؟ حتى يستلمون الحكم بالتسلسل مثل اخوان ملوك السعودية اللي ابوهم ورثهم ملك عجيب لازم الأخوة - مو الابناء - يتوارثوه الواحد وره الآخر، وسنة ورا سنة الأخوة يصلون الى أرذل العمر واذا واحد طول عليهم هواية ومابقى وقت ، يموت ذاك الأخ بالسلاح أو بالسم أيهما أقرب.

شفتوا المشكلة ؟ سيحدث اخلال واختلال وارباك وتشويش على المحاصصة وهي اصل الدستور في العراق الجديد. زين شنو الحل؟

هناك 5 تعليقات:

  1. بالجهنم و بأس المصير .. وكل من نوايب بأسهم بينهم و فخار يكسر بعضه .. عيني عشتورة أني متابعة قديمة إسمها سومر غبت صارلي زمان من أيام الرقيق و تجارته .. كتاباتج سببت لي مشاكل صحية وضغط نفسي و توتر قصدي زيدت كل ما مر ذكره فقاطعتج و قاطعت كل وسائل الاعلام على كل حال مفادت المقاطعة و يومية أحرك بنفسي حرك الله يحرك اللي ببالي و بالج يارب .. نرجع لموضوعنا تعرفين من الاحقر من النوايب السني اللي كاعد بين هالقنادر ذولة .. لأن لوما كم سني بايع و مخلص و محسوب على السنة جان نالت هالحكومة الجربة لقب حكومة العصر العنصرية و خليفة حكومة جنوب أفريقيا و كل أحرار العالم جان و كفوا ويانا و حترمونا بس لوما ذولة لعنة الله عليهم و على اللي جابهم علينا و أتسموا سنة أنطوا للحثالة قيمة على أساس التعدد يو اللي يعددون عليهم و يلطمون آميييين

    ردحذف
  2. ثورة في تونس .. وظن الجزائر سوف تلحقها وانفصال حتمي لجنوب السودان والحراك اليمني الجنوبي على اهبة الاستعداد وشعب العراق لاطم على فاطم

    ردحذف
  3. طبعا الى جهنم وبئس المصير، لكن فعلا منين يلاقون واحد بضخامته يسد الشاغر، اقصد يسد المكان باعتباره كما تعلمون صمام الامان.
    وبعدين ياعيني ياست سومر، هذوله الي سميتيهم سنة، شنو يفرقون عن الباقين، شوية عملاء مأجورين لأداء مهمة، وبعدين مصيرهم سلة الزبل، يعني الاحتلال يحتاج شوية سنة على شويه شيعة، على شوية اكراد، حتى تكمل الطبخة، وطبعا ماننسى باقي المكونات والاطياف والالوان ...الخ في عراقهم الجديد

    ردحذف
  4. وصل هذا التعليق بالبريد

    zozik alnaaimey - خل يختارون النائب التركماني اولا لان المشكله الآن هل يكون تركماني شيعي لو تركماني سني وغاديه بل......يمكن حكومتنه تشتري المشاكل بفلوس ومن هالمال حمل جمال

    ردحذف
  5. عزيزي زوزك

    لا تخاف.. ماراح يحتارون بالتركماني الشيعي او السني. ولا الكردي الشيعي او السني. كلمة شيعي وسني مرتبطة بالعرب فقط وليس بقية القوميات. هذه هي الحيلة الاستعمارية الانجلو ساكسون الكردو-صهيون لتشتيت القومية الأكبر في العراق

    ردحذف